G. İsxaqıy turında uylanular

Г. Исхакый турында уйланулар
Тарханова Гүзәлия 13 iyul', 2009 - 22:40

Г. Исхакый турында уйланулар

Här keşeneñ tormışı – üzenä ber tarix. Beräwlärneñ ul, üz köyenä genä aqqan yılğa kebek, tınıç qına, sizdermiçä uza. Ä ikençelärneke yarsu taw yılğasına oxşağan: yulında oçrağan waq-töyäk närsägä iğtibar itmiçä, qayadır aşkına, gel alğa omtıla. G. İsxaqıy – tatar tarixında änä şul taw yılğası tösle köçle, qırıs, ciñelmäs köräşçe, olı ädip häm böyek şäxes bularaq urın alğan keşe. Citmeş altı yıl ğomereneñ altmış yılın milläte öçen köräşep ütkärgän ul. Şul waqıt eçendä 55 äsären kitap itep bastırıp, 500 läp mäqäläsen yazıp ölgergän, härçaq xalqınıñ milli üzañın üsterüne küzdä totqan.

Tatar milläten irekle itep kürü G. İsxaqıynıñ töp xıyalı bulğan. Ul ğomer buyı üz xalqın köräşergä, mesken bulmasqa öndägän, ruxi yaqtan köçle itep tärbiyälärgä telägän. Mondıy keşelärne millätneñ qaharmanı dip atıylar. Tarixqa änä şulay zur öleşen kertkän keşe ul. Tatar milläte küpme izelülärgä duçar itelep tä, bügen isän-saw ikän, ul G. İsxaqıy kebek böyek şäxeslärenä burıçlı, minemçä. Tormış iskitkeç qatlawlı närsä. Anıñ arbasınnan töşep qalmas öçen, küpme ixtıyar köçe, küpme tırışlıq kiräk. Xätta sine tormış arbasınnan tibep töşersälär dä (bezneñ ildä andıy yazmışqa xökem itelgännär bik küp), qabat sikerep torıp, ayaqqa basa alu barı tik köçle şäxeslärgä genä xas tügelmeni?

Ğayaz İsxaqıynı da tatar xalqınıñ tarixınnan sızıp taşlarğa telägännär. İsemen dä äytergä yaramağan zamannar bulğan, läkin çista namusqa ker qunmıy, dilär bit. G. İsxaqıy millätebezneñ aqılı, namusı bulıp qalğan häm ul ber dä taplanmağan. 60-70 yıllarda tatar mäktäplärendä uqığan äti-änilärebez söyläwençä, ul yıllarda ädäbiyät däreslärendä G. İsxaqıy turında bernindi dä mäğlümat birelmägän, äsärlären uqu tügel, isemen dä belmägännär. Änä şundıy yullar belän xalıq xäteren yuq itärgä tırışsalar da, xalıqnıñ uqımışlı qatlawı üzeneñ İsxaqıy kebek böyek zatların onıtmadı.

Berketelgän faylKüläme
G. İsxaqıy turında uylanular [0]48 KB

VK фикерләре