Biografiyägä kilgändä...

Tarxanova Güzäliyä İnsaf qızı 1954 yılnıñ 22 nçe iyülendä Aqtanış rayonı Qalmaş awılında tuwa. 1971 yılda Taqtalaçıq urta mäktäben tämamlap, KDUnıñ tarix-filologiyä fakul’tetına uqırğa kerä. Anı tämamlağäç, 10 yıl däwamında Çistay rayonı Tatar Talqışı awılında tarix uqıta. 1983 yılda ğailäse belän Yar Çallığa küçä häm şähär mäktäbendä tatar tele häm ädäbiyatın uqıta başlıy. Şunda uq Özleksez pedagogik belem birü institutında (ÖPBBİ) tatar tele häm ädäbiyät belgeçlege buyınça diplom ala. 1991 yıldan alıp 2009 yılğa qadär 22 nçe urta ğomumi belem birü mäktäbendä eşli, tatar tele uqıtuçılarınıñ metodik berläşmäsen citäkli. 15 yıl däwamında tatar tele uqıtuçıların attestatsiyäläw buyınça şähärküläm ekspert gruppasında häm olimpiada, medal’ eşlären tikşerü buyınça şähär komissiyäsendä uñışlı eşläp kilä. 2009 yılda ğailäse belän Qazanğa küçep kilä häm xezmät eşçänlegen Waxitov rayonınıñ 96 nçı gimnaziyäsendä däwam itä.

Tarxanova Güzäliyä uqıtu-tärbiyä sistemasında A.Z. Räximovnıñ üstereleşle belem birü texnologiyäsen qullanıp eşläw näticäsendä şaqtıy zur uñışlarğa ireşä. Şähär häm respublika külämendä üz täcribäse belän daimi urtaqlaşıp kilä: açıq däreslär ütkärä, konferentsiyälärdä, avgust kiñäşmälärendä çığışlar yasıy, törle programmalar tözi. Mäsälän, 2004 yılnıñ 11 nçe martında respublika fänni-ğämäli konferentsiyäsendä “Ğämäldäge tatar tele häm ädäbiyät däreslekläre, programmaları: fikerlär häm täqdimnär”, 2006 yılnıñ 13-14 aprelendä regionara fänni-ğämäli konferentsiyäsendä “Belem bir&¨ sistemasın modernizatsiyäläw şartlarında tatar telen häm ädäbiyatın tuğan tel bularaq uqıtu problemaları” temaları buyınça dokladlar yasıy. 2006 yılda Tuqay rayonı uqıtuçılarınıñ Avgust konferentsiyäsendä “Ğämäldäge tatar tele häm ädäbiyät däresleklärenä, programmalarına küzätü” temasına çığış yasap, rayon uqıtuçılarına metodik yärdäm kürsätä.

Güzäliyä İnsafovna ÖPBBİ qarşında oyıştırılğan kvalifikatsiya kütärü kurslarında häm regional’ seminarlarda törle temalarğa innovatsion däreslär kürsätä. Mäsälän, “Möxämmäd’yarnıñ “Töxfäi Märdan” poemasın analizlaw” (A.Z. Räximovnıñ üstereleşle belem birü texnologiyäse buyınça), “Ä. Fäyzineñ “Tuqay” romanı buyınça “Ğabdullanıñ Cayıq mädräsäsendä uquwı” bülegen analizlaw” (üstereleşle belem birü texnologiyäse buyınça), “İ. Yüzeyevnıñ “Baqçaçı turında ballada”sın analizlaw” (komp’yuter texnologiyälären qullanıp) h.b. bik küp däreslär başqa uqıtuçılarğa metodik material bulıp xezmät itä.

Tarxanova Güzäliyä bik küp programmalar, mäsälän, “Şkola liderstva”, “Tatar teleneñ stilistikası” elektiv kursları, “Ädäbiyät teoriyäse” tügäräge häm uquçılarnıñ fänni eşen oyıştıru programmaları avtorı.

Uqıtuçınıñ xezmäte üz uquçılarınıñ icadi eşçänlegendä çağılış taba. Alar şähär häm respublika olimpiadalarında, icadi konkurslarda, fänni konferentsiyälärdä qatnaşıp, prizlı urınnar yawlıylar. Anıñ küp kenä uquçıları tatar tele häm ädäbiyatı uqıtuçısı hönären saylıylar.

Güzäliyä İnsafovna äybät äni dä. İre belän bergäläp alar öç bala tärbiyäläp üsterdelär. Zur ulları Niyaz Tarxanov Qazan däwlät konservatoriyäsen tämamlap, Çallı drama teatrında kompozitor häm muzıkal’ citäkçe bulıp eşli. İkençe ulları İlnaz Tarxanov ICL kompaniyäsendä IT-texnologiyälär ölkäsendä belgeç bulıp eşli, törle illärdä komandirovkalarda bula. Qızları Gölnaz 2008 yılda İnjener-iqtisad aqädemiyäsen qızıl diplom belän tämamladı, xäzerge waqıtta ekonomist-menedjer wazifaların başqara.

¨

VK фикерләре