Qoşlarğa yärdäm itü – sawaplı eş

Qoşlarğa yärdäm itü
Тарханова Гүзәлия 24 fevral’, 2012 - 22:34

Bıyılğı qışnıñ iñ salqın köne ide. Avtobustan töşkäç, tiz-tiz atlap, öygä qaytıp baram. Aşamlıqlar kibete yanınnan uzıp barğanda, küzem basqıç qırıyında cirdä utıruçı kügärçengä töşte. Aç ikäne kürenep tora. Min salqın könnärdä üzem belän yarma yörtäm, avtobus tuqtalışında sibep, kügärçennär, çıpçıqlar tuydırırğa yaratam. Sumqamnan alıp, tarı yarması sipsäm dä, ul aşarğa aşıqmadı. Kügärçen bar närsägä bitaraf ide, bolay qaldırsañ, salqınnan qatıp üläçäge kön kebek açıq. Qulımа aldım da öygä qaytıp kittem.

Ayaq kiyemennän buşağan tartmağa quyıp, cılı çüpräk belän qapladım. Qarışmıy da, talpınmıy da, başın çığarıp qarap utıra bu. Qaraşı tere. Şunısı ğacäp: çüpräk qaplağan kileş yartı täwlek utırdı bu. İkençe kön qıştırdıy başladı. Aşarına salsaq ta, bernärsä dä qapmadı. Tağın yartı täwlek ütkäç kenä, iñ elek küp itep su eçte, annan soñ ğına tarı yarmasın çüpli başladı. Östäl astına ğazetalar cäyep, tirä-yağın tartmalar belän äyländerep aldıq. İsemen Görgöri dip quştıq.

 Öç täwlek şunnan çıqmadı. Aşıy da tartmasına menep qunaqlıy. Öydägelär süz äytmilär. Çığarsañ qatıp üläçäk, beraz xäl kersen, dip, öydä totabız. Koridornıñ buyınnan-buyına ğazetalar cäyep, yörtep kertäbez. Yörgändä şul yuldan çıqmıy, pıçratmıy da, äyterseñ lä öyrätelgän ide ul. Dürt täwlek digändä, başın kütärep, oçıp qunar öçen, urın küzli başladı bu. Koridorğa urındıq quydıq. Şunıñ arqasına qunıp, ozaq qına utıra da töşep äkren genä östäl astına kerä. Ber könne östäl yanınnan ütkändä, anıñ östenä sikerep mende, tik ozaq tormadı, öydäge popugay tawışına aldanıp, idängä töşte. Ber atna digändä, ul tämam nığıp citte. Östäl astında görläp tä alğalıy. Atna tulğaç, uramğa alıp çıqtıq. Ber-ike yarma qaptı da ruxlanıp oçıp kitte Görgöriyebez.

VK фикерләре