Xuş, Şamil abıy

Tatar dönyäsı, tatar teatrı bu könnärdä zur qayğı kiçerä. 26 nçı fevral’dä Ğaliäsgar Qamal teatrınıñ direktorı Şamil Zinnur ulı Zakirov wafat buldı. Bu yuğaltu Tatarstan öçen genä tügel, Rusiyäneñ törle töbäklärendä yäşäwçe tatarlar öçen dä kötelmägän xäl bularaq qabul itelde. Soñğı aylarda Şamil Zinnuroviçnı yöräge borçısa da, xastaxanägä kerep yatu turında uylamağan ul. Gastrol’lär oyıştırıp yörü, xucalıq mäşäqätlären xäl itü h.b. eşlär aña üze turında uylarğa mömkinlek birmägän.

Teatrnı iñ awır çorlarda da saqlap qala alğan direktornıñ başqalarğa qılğan yaxşılıqların sanap beterä torğan tügel. Anıñ ğadel citäkçe buluwı turında här artist söyli. Ul berqayçan da üze turında uylamadı. Şamil Zinnuroviç härçaq artistlarınıñ yaxşı şartlarda yäşäwe turında qayğırtıp yäşäde. Alarnı fatirlı itü, waq-töyäk tormış mäşäqätlären xäl itärgä yärdäm itüne ul iñ ähämiyätle burıçlardan sanadı. Keşegä härwaqıt yärdäm qulı suzarğa, awır xällärdän çığu yulın tabarğa bulıştı ul. Berär artistı awırıp kitsä, anı xastaxanägä urnaştıru, ğailälärenä bulışu da anıñ öçen çirattağı wazifalardan sanala ide.

 1983 yıl. Bez Çallığa küçep kildek. Yartı yıldan ike bülmäle fatir aldıq, döresräge, Şamil Zinnuroviç yärdäm itte. 2004 yıl. Ulım İlnaz Qazanğa eşkä urnaşırğa teläde. Şähär propisqası kiräk. Şamil Zinnuroviç yardäme belän bu eşne dä uñışlı xäl ittek. Bolar äle bezneñ ğailägä yärdäm itü oçraqları ğına. Bezneñ kebek küpme keşegä yärdäm itte ul. Awırsınmıyça, bernärsä dä taläp itmiçä, tıynaq qına eşli ide ul yaxşılıqların. Ğomer buyı keşelärgä igelek qılıp yäşägän bu izge keşe ayaqtan yığılğaç, aşığıç yärdäm çaqırtalar. Kilä “aşığıç” yärdäm, tik ber säğättän soñ. Alarnıñ “yärdämen” kötep citkerä almıy awıru yöräk. Qayçandır Xäydär Bigiçevnı da qotkarıp qala almağan “şäfqät iyäläre” bu yulı da artıq tırışlıq kürsätmägännär bulıp çıqtı.

 28 nçe fevral’dä Şamil Zinnuroviçnı soñğı yulğa ozatırğa böten tatar dönyäsı kilgän ide. Sarıtaw, Samara, Orenburg, Başkortstan h.b. töbäklärdän kilgän tatarlar, artistlar, yazuçılar, uqıtuçılar, ğadi xalıq altın yöräkle şäxes belän xuşlaştı. Bar da yılıylar, soñğı ixtiram süzlären äytälär. Anıñ cäsäden inde küptän baqıylıqqa küçkän böyek tatar şäxesläre belän berrättän iske tatar ziratına cirlädelär. Xuş, Şamil abıy. Canıñ cännättä bulsın. Tatar xalkınıñ yaratqan ulı ruxına qılğan doğalarıbız qabul bulsın.