Bezne söyendergän xäbär

Тарханова Гүзәлия 31 oktyabr', 2011 - 21:50

Тукайга һәйкәл2011 yılnıñ sentyabr' ayında Başqortstan tatarlarınıñ yaratqan gäzite “Qızıl tañ” belän berlektä ber törkem cämäğat eşleklese, yazuçılar, ğalimnär barlıq törki xalıqlarnıñ söyekle şağıyre Ğabdulla Tuqayğa häykäl açu initsiativasın kütärep çıqqannar ide. Bu ideyäne bik küplär xupladılar, çönki ğadi xalıqnıñ ruxi dönyäsın, barlıq uy-xıyalların üz icatında çağıldırğan Tuqaynı härkem yarata, iñ olı xörmätkä layıq dip sanıy. Bu xäbärne işetkäç, Tuqaynı üz itkän, anıñ böyeklegen tanığan här keşe söyende. “Qızıl tañ” başlağan bu eşneñ tizdän näticäse dä kürende. Başkortstan tatarların häm kiñ cämäğatçelekne quwandırıp, Ufa şähäre administratsiyäse 26 nçı oqtyabr'dä böyek Tuqayğa häykäl quyılaçağı turında qarar qabul itte häm qararda bulaçaq häykälneñ urının da iğlan itte. Ul “Nur” teatrı qarşında urın alaçaq.

Mondıy izge ğämälne başlap cibärüçelärneñ, bigräk tä “Qızıl tañ” xezmätkärläreneñ çın küñeldän başqarğan bu eşenä soqlanabız, alarnı xuplıybız. Gäzitçelärneñ süzenä qolaq salğannar ikän, dimäk, alar başqalarnı da ışandıra häm üz artlarınnan iärtä alırlıq däräcädä köçle häm xörmätkä layıq buluların tağın ber qat rasladılar. Min üzem Qazanda yäşim, ämma bu gäzitneñ eşçänlege belän tanışmın. Alar härçaq, kemneñder mänfäğätlären küzdä totmıyça, xaqlıq häm çın döreslek öçen obyektiv eş yörtälär. “Qızıl tañ” Başkortstanda yäşäwçe tatarlarnıñ çın dustı da, ışanıçlı tayanıçı da. Afärin, qälämdäşlär! Buldırdığız! Gel şulay namuslı bulıp qalığız.

VK фикерләре