“Urınnarı cännättä bulsın”

Xörmätle kollegalar!

R. Batullanıñ 2007 yılda “Ruxiyät” näşriyätında basılıp çıqqan “Urınnarı cännättä bulsın” kitabın uqırğa ölgerdegezme äle? Ägär dä yuq ikän, tiz arada tabıp uqıp çığığız äle. Här ädäbiyät uqıtuçısınıñ östälendä torırğa tiyeşle kitap bu. Ädäbiyät häm teatr tarixına kermägän, ämma böyek ädiplär, sänğät eşlekleläre tormışın yaqtırtqan ğäcäyep mäğlümatlar tuplanğan anda. Sez Tuqay, Taqtaş, Därdemänd, Rämiyev kebek böyeklärebez turında da, alardan soñ ädäbiyät mäydanına kilgän başqa şağıyr-yazuçılarıbız turında da bik küp närsälär uqıy alasız.

Stalin repressiyäse yıllarında ğazap çikkän häm axır çiktä törmälärdä yuq itelgän zatlı şäxeslärebez turında da bay materiallar bar bu kitapta. Şunısı ähämiyätle, R. Batullanıñ här yazğanı fänni dokument bulıp torırlıq, çönki şul şäxeslärneñ üz awızlarınnan işetep yäki alarnı belüçelärdän yazıp alınğan äyberlär alar.

Döres, istäleklärneñ qayberläre törle yıllarda “Qazan utları”nda basıla kilde, ämma bu kitapta barlıq waqıyğalar bergä tuplanğan. Uqısağız, hiç tä ükenmässez. Xalqıbıznıñ böyek tarixın, tirän faciğasen beläsegez kilsä, bu kitap sezneñ öçen alıştırğısız mäğlümat çığanağına äyläner.

İxtiram belän Güzäliyä.