Tuqay premiyäse kemnärgä tiyeş?

Габдулла Тукай
Тарханова Гүзәлия 1 mart, 2014 - 20:24

Matbuğatta 2014 yılda Ğabdulla Tuqay isemendäge TR Däwlät premiyäsenä däğwa qıluğa täqdim itelgännär isemlege çıqtı. Bu isemlekkä kergän şäxeslärne beläbezme? Bıyıl bu bäxetkä kemnär layıq bulır? Ğadellek ciñärme, ällä...

İñ elek isemlekkä küz salıyq:

1. Bulatova Klara Ğarif qızı (şağıyrä)
2. Ğıyzzätullina Flera Sabircan qızı (şağıyrä)
3. İl'yasov Rafael Zarip ulı (cırçı)
4. İmamov Waxit Şäyex ulı (yazuçı, “Utlı dala” romanı öçen)
5. Wäliäxmätov Fän Ğawis ulı (cırçı)
6. Samakayev İlgizär Mayber ulı (rässam, “Sara Sadıykova”, “Yuriy Nikulin” portretları öçen)
7. Sibağatullin Fatix Säwban ulı
8. Sladkovskiy Aleksandr Vital’yeviç (Tatarstan kompozitorları antologiyäse öçen)
9. Popov Vladimir Aleksandroviç

Flera Ğıyzzätullina bu büläkne 2012 yılda alırğa däğwa qılğan ide, tik anı ul çaqta nıq räncettelär: bu premiyäne birmädelär.

2013 yılda Klara Bulatova belän şundıy uq xäl bulğan ide, anı da büläksez qaldırdılar. Bıyıl ikesen dä isemlekkä kertkännär. Kemnärneñder oyatlarına köç kilgänder, möğayen. Ğomer buyı tatar şiğriyäten üsterügä köç quyğan bu şağıyrälärebez çın-çınlap layıq bu büläkkä. Alar eşlägänneñ çiregen dä eşlämägän keşelär alıp beterde inde anı.

Bıyıl bu isemlekkä tarixi romannar yazuçı häm ozaq yıllar buyı “Mäydan” jurnalın citäkläwçe Waxit İmamovnı kertep tä bik döres eşlägännär. Ul moña küptän layıq, çönki tatar tarixınıñ başqalar qağılmağan ölkälären surätläp yazğan romannarı tatar millätenä bik tä kiräk. Waxit – üz süzen qurıqmıyça äytä torğan namuslı şäxes.

Rafael abıy İl'yasov – tatar moñınıñ çın sanduğaçı, disäm, ber dä arttıru bulmas. Xalıqnı säğätlär buyı awızına qaratıp tota alğan mondıy zatlı cırçılar bik siräk. Xalıqqa buşlay kontsertlar kürsätep, zur xezmät quyuçı xörmätle cırçılarıbıznıñ berse bit ul. Tizdän mikrofonnan başqa cırlıy da almağan häm tatar cırına berni dä öleş kertmägän “yoldız”larğa da tağa başlarlar Tuqay premiyäsen. İsän-saw waqıtlarında Rafael İl'yasov kebek çın yoldızlarıbıznı xörmätli alsaq ide.

İke portret yazğan öçen dä (Samakayev İlgizär, citmäsä, rässamnarnıñ Baqıy Urmançı isemendäge üz premiyäläre bar), entsiklopediyälärdä tulıp yatqan mäğlümatlarnı cıyıp, kompozitorlar turında kitap (antologiya) çığarğan öçen dä (Sladkovskiy Aleksandr) tarata başlasaq bu premiyälärne, anıñ ruxi-tärbiyäwi qıymmäte bötenläy yuğalmasmı? Tatarğa Tuqaynıñ 5 tomlığın äzerläp birgän märxüm Raşat abıy Ğaynanov kebek zıyalı ğalimnärgä dä birelmägän bit ul premiya. Menä kemnärgä birergä kiräk ide ul premiyäne. Xäzer ber antologiya tözep tä şuña ömetlänälär. Adäm xurlığı. Kollegalar, gazeta-jurnallarğa üz fikerebezne yazıyq. Bezneñ respublikabız eçendä çın ğadellek bulsın ide. 

VK фикерләре

Fiker östäw